اسمعوا ما جرالي من هلي يا شعوب

الشاعرة اثني جموح

اسمعوا ما جرالي من هلي يا شعوب

......................... عبّرولي بِراي ٍ ما يعرف المزوح
اصدقوا في جوابً ما يجيبه كذوب

......................... بعدما تفهموني بعدما به أبوح
مرّ بي من لقيته في ثواني غروب

......................... صادني من عيونه شي ماله شروح
صاد قلبي هويته خفت منّه أذوب

......................... قلت لا لا تعلّق خافقي خلّ يروح
مرّت أيام شوقي ناطره في شحوب

......................... علّ روحي تلاقى وسط صدره بروح
يوم أنا قلت لازم آتناسى وجوب

......................... جا خطبني فديته والقهاوي تفوح
قلت طبعاً أوافق شخص مابه عيوب

......................... كل شعوري تزّين بالأمل والفروح
واكتساني زهوً أزهرت به دروب

......................... والتقتني حروبي بانتصار وْ فتوح
والدي قال إنسي ولد عمّك عزوب

......................... إيش رايك؟ بجيبه , ثم نقول السموح
قلت : عمي ، وولده له قدر ومْحَسوب

......................... بس هذا طلبني وارتضيته طموح
مادرى بي رضيته من بلاوي قلوب

......................... قلت بشفَى لقيته زاد فيني جروح
احكموا يا رجالً فاهمين الخطوب

......................... بعدما قلت أوافق واعتليت الصروح
ردّ ابويه وقله : تلقَ منهو ينوب

......................... وانا مالي بحيله بس أونّ وْ أنوح
وانتهي كلّ شيً علّني مِنْه أتوب

......................... بس قولو وبقسى وآتناسى واروح!