الله يوفقك ويسمح دروبك

الله يوفقك ويسمح دروبك
انت يامن كنت للخافق ربيعّه

ياعسى ثوب الرخى والسعد ثوبك
وين ماقبّلت في الدنيا الوسيعة

والله اني ماقطعت الوصل صوبك
ولابعد فكرت اجازيك القطيعّة

لو خذوك ,, ولو قفوا بك وابعدو بك
راح تبقى صورة الحب البديعة

حتى لو تضحك لهم لا مادرّوا بك
انه اول حب لك صعبٍ تضيعه

راح تبقى مثل ماتكره ذنوبك
تكره انك من هوا قلبك ,, تبيعه

ياكبيرٍ في عيوني من عيوبك
انت مابك شي ينعاب واشيّعه

يا الاصيل اللي ابد ماساومّوا بك
هقوتي فيك ومعانيها رفيعة

عيش في عزك على كيفك ودوبك
واهمس لقلبك وخذ منه وطيعه

ياعسى يفدون عينك من غدوا بك
انت ,, انت يامن كنت للخافق ربيعه