الله يجازي من يسوي سواتك \\\\ و بذنوب من سوا سواتك يجازيك
مشيت درب الثقل وتحب ذاتك \\\\ ماتدري انه للمهالك يوديك
غرك جمالك ياخسارة حلاتك \\\\ ماتدري ماغير طبعك يحليك
بتقول زينك يشفع السيئاتك \\\\ الحسن ماهو عن وفا الحب يعفيك
لو التواضع والوفا من سماتك \\\\ بعت الحبايب كلهم دين وشريك
لاكن عجزت اغيرك ياجراتك \\\\ على الغياب اللي بلا عذر ينجيك
خطاي في توضيح وشهي غلاتك \\\\ وخطاك في توضيح وشهو تغليك
وشلون توصيني وتنسى وصاتك \\\\ وتصد عن صوت(ن) تقطع يناديك
مافادك التجريح والعذر فاتك \\\\وتبغي رضاي الحين ماعاد يمديك
صحيح احبك بس هذي جزاتك \\\\ بعلمك درس(ن) يفيدك ويحييك
تدري وش ابيض من خفوقك عباتك \\\\ وتدري وش اللي غرني نظرتي فيك
أدري بتستغرب تصبر وجاتك \\\\ قصيدت(ن) من واحدن كان يبغيك
تبغي تناظر وانت عايش مماتك \\\\ شف وحدتك والناس تجلس حواليك
وتبغي تشوف أشجع رجل في حياتك \\\\ شفني وانا مقفي على كثر ما اغليك