هاذ الدنيا تفـــــارق وتلاقي مــرة تجيــــــب ومرة تـــدي
واحـــــد فيـــــنا ماهو لاقي روحـو وراحتو فالدنيا هاذي
عارف راكي حابة تفــارقي مــــــاهوغرضك ولا غرضي
فاهمك ماشي حتى تنطقي و بـــالمكتوب رانــي راضي
المهم خرّجتـلك كـل وراقي حبيـــــتك و مديـــــتـلك يــدي
انتي الي بغيــــــــتي تتلقي الله غالب ماجاتش من عندي
فالآخر انا خـرجـــــت نـقي صافي وافي وفيـــت بوعدي
ما رحت غـربي ولا شـرقي حبيتك وحدك وكـــنت وحدي
عملت كل مـــــاهو شـــاقي على جـــــال بــــــاش تقعدي
باش طريقك يكون طـريـقي وولادك نشالله يكونوا ولادي
كنت حاسبك ليـــا تصــدقي لمــــا كنـــــت فيـــا توعدي
عارف ماقدرتيش اتـــطبقي معليش روحي راني راضـي
بصح نظن بلي مــــن حـقي نعرف علاش بغيـــتي تغدي
وتخليــــني عمـــري البـاقي نكملـــو وحــدي هايـم وحدي
اذا كــــــان المشكـــل رزقي مــــــا تقنعتيــــش بلي عندي
نقولك هــاذي حاجت خالقي والرزق عمـــرو كــان بيدي
انا وحــــــدي درت طـريقي مـــــــاخلاوليش بويا وجدي
نحب نجيب الحــاجة بعرقي او واش كتبلــــي ربــي ندي
بغيتي تطيري روحي اسبقي انــــا نمشي غير في غرضي
من قلبي نتمنـــالك تلحـــقي وتعيشي ميــــات سنــة بعدي
وتلقاي كامل واش تسحقي ويد وحدوخرا خير من يدي
بصح نظن بلّــــي من حقي نخــــاف عليك مالدنيا هاذي
دنيا فيـــــها السعـيد الشاقي تتنكتــــب فيك نهــار تتولدي